მონაცემთა გამოყენება და წაშლა
ამ გვერდზე, არხების მიხედვით, აღწერილია, რა მონაცემებს იღებს CyFlow და რისთვის იყენებს, რას არასოდეს აკეთებს მათთან, რამდენ ხანს ინახავს და როგორ შეუძლია თითოეულ პირს მათი წაშლა. გვერდი [კონფიდენციალურობის პოლიტიკის](/ka/privacy) ნაწილია. ის გამოქვეყნებულია ქართულ და ინგლისურ ენებზე; შეუსაბამობის შემთხვევაში უპირატესობა ენიჭება ქართულ ტექსტს.
1. ვინ იღებს გადაწყვეტილებას მონაცემებზე
ბიზნესი, რომელიც CyFlow-ს იყენებს, თავად წყვეტს, რა ემართება მის კლიენტებთან მიმოწერას: ის არის ამ მონაცემების დამუშავებისთვის პასუხისმგებელი პირი. CyFlow მათ ამუშავებს როგორც დამუშავებაზე უფლებამოსილი პირი: ბიზნესისთვის (CyFlow Inbox-ში) ან იმ პროგრამისთვის, რომელსაც ბიზნესი იყენებს (API-ით). საკუთარ მონაცემებზე (Inbox-ის მომხმარებლების ანგარიშები, კავშირებისა და უსაფრთხოების ჩანაწერები) გადაწყვეტილებას CyFlow იღებს. ამიტომ, ვის რისი წაშლა შეუძლია, დამოკიდებულია იმაზე, ვინ ხართ (მე-5 პუნქტიდან მე-10 პუნქტამდე).
2. რა მონაცემებს ვიღებთ თითოეული არხიდან
CyFlow იღებს მხოლოდ იმას, რასაც არხი გადმოგვცემს, როცა ბიზნესი მას აკავშირებს და როცა ვინმე წერს. ამ მონაცემებს ვიყენებთ მხოლოდ შეტყობინებების მისაღებად, საჩვენებლად და მისაწოდებლად, ბიზნესის პასუხების გასაგზავნად, არხის პასუხის წესების დასაცავად და კავშირის გამართული და უსაფრთხო მუშაობისთვის.
- Telegram (ბიზნესი CyFlow-ის ბოტს Telegram Business-ში ამატებს): შეტყობინებები იმ ჩატებიდან, რომლებზეც ბიზნესი ბოტს წვდომას აძლევს, კლიენტის Telegram-ის იდენტიფიკატორი, სახელი და მომხმარებლის სახელი, ფაილები; ბიზნესის მფლობელის Telegram-ის იდენტიფიკატორი, ვინც ბოტი დააკავშირა.
- WhatsApp: ბიზნესის WhatsApp Business ანგარიშის იდენტიფიკატორი, ნომერი და სახელი; კლიენტის ტელეფონის ნომერი და WhatsApp-ის პროფილის სახელი; შეტყობინებები, ფაილები, მიწოდებისა და წაკითხვის დადასტურებები; შაბლონების სახელები და სტატუსი. თუ ბიზნესი აკავშირებს ნომერს, რომელსაც WhatsApp Business აპლიკაციაშიც იყენებს, Meta მას საკუთარ ფანჯარაში სთავაზობს, გაგვიზიაროს WhatsApp-ის კონტაქტები (სახელები და ნომრები) და დაახლოებით ბოლო ექვსი თვის მიმოწერა, შემდეგ კი შეტყობინებები, რომლებსაც ბიზნესი ტელეფონის აპლიკაციიდან აგზავნის.
- Facebook Messenger: გვერდის იდენტიფიკატორი და სახელი, იმ პირის Facebook-ის იდენტიფიკატორი, ვინც გვერდი დააკავშირა, კლიენტის იდენტიფიკატორი ამ გვერდისთვის, შეტყობინებები და ფაილები. Inbox-ში კლიენტის პირველი შეტყობინების შემდეგ CyFlow Meta-ს მის სახელს ეკითხება.
- Instagram: პროფესიული ანგარიშის იდენტიფიკატორი და მომხმარებლის სახელი, იმ პირის Instagram-ის იდენტიფიკატორი, ვინც ანგარიში დააკავშირა, კლიენტის იდენტიფიკატორი, შეტყობინებები და ფაილები. Inbox-ში კლიენტის პირველი შეტყობინების შემდეგ CyFlow Meta-ს მის სახელსა და მომხმარებლის სახელს ეკითხება.
- კომენტარები პოსტებზე (მხოლოდ თუ ბიზნესი მათ ჩართავს): კომენტარის ავტორის სახელი ან მომხმარებლის სახელი და კომენტარი ბიზნესის საკუთარ Instagram-ისა და Facebook-ის პოსტებზე, ბიზნესის საჯარო პასუხები და ერთი პირადი პასუხი.
- Viber: ბიზნესის საკუთარი ბოტი და მისი ტოკენი (დაშიფრული), კლიენტის Viber-ის იდენტიფიკატორი და სახელი, შეტყობინებები და ფაილები.
- საიტის ჩატი: ის, რასაც სტუმარი ჩატის ფორმაში შეიყვანს (სახელი, ტელეფონი, ელფოსტა), შეტყობინებები და, ბოროტად გამოყენების შესაზღუდად, სტუმრის ქსელური მისამართის შემოკლებული ცალმხრივი ჰეში.
- ელფოსტა: კლიენტის ელფოსტის მისამართი, წერილის თემა, ტექსტი, მიმოწერის იდენტიფიკატორები და დანართები, რომლებიც ბიზნესის CyFlow-ის მისამართზე ჩვენი ელფოსტის მიმწოდებლის მეშვეობით მოდის.
- SMS: კლიენტის ტელეფონის ნომერი და ტექსტი, uBill-ის მეშვეობით; ბიზნესის გამგზავნის სახელი და მის მიერ დაწერილი აღწერა, რომლებიც დასამტკიცებლად uBill-ს ეგზავნება.
ყველა არხზე CyFlow ასევე ინახავს შეტყობინებების მეტამონაცემებს (იდენტიფიკატორი, მიმართულება, ტიპი, დრო, კლიენტის იდენტიფიკატორი არხში) და კლიენტის ბოლო შეტყობინების დროს, რომლითაც განისაზღვრება, შეიძლება თუ არა პასუხის გაგზავნა. მონაცემთა სრული ჩამონათვალი და დამუშავების საფუძვლები მოცემულია კონფიდენციალურობის პოლიტიკაში.
3. რას არასოდეს ვაკეთებთ
- არ ვყიდით, არ ვაქირავებთ, არ ვალიცენზირებთ და არ ვყიდულობთ არცერთი არხიდან მიღებულ მონაცემებს.
- არ ვიყენებთ მათ რეკლამისა თუ მარკეტინგისთვის და რეკლამას არ ვაჩვენებთ.
- არ ვქმნით და არ ვავსებთ ადამიანების პროფილებს და არ ვაერთიანებთ სხვადასხვა ბიზნესის მონაცემებს.
- არ ვიყენებთ მათ თვალთვალისთვის ან იმის გადასაწყვეტად, ეკუთვნის თუ არა ვინმეს საცხოვრებელი, სამსახური, დაზღვევა, განათლება, სესხი, სახელმწიფო დახმარება ან საიმიგრაციო სტატუსი.
- არ გადავცემთ მათ მონაცემებით მოვაჭრეებს ან მონაცემების სხვა მყიდველს.
- შეტყობინებებს, ფაილებსა და საკონტაქტო მონაცემებს არ ვიყენებთ ხელოვნური ინტელექტის მოდელების გასაწვრთნელად ან გასაუმჯობესებლად, არც ჩვენი და არც სხვისი. CyFlow მიმოწერაზე ხელოვნურ ინტელექტს არ იყენებს.
Meta-სგან (Facebook, Instagram, WhatsApp) მიღებული მონაცემები Meta-ს პლატფორმის პირობების მიხედვით „პლატფორმის მონაცემებია“. მათ ვიყენებთ მხოლოდ იმისთვის, რომ CyFlow-ის მომსახურება გავუწიოთ ბიზნესს, რომელმაც ანგარიში დააკავშირა; ვუზიარებთ მხოლოდ კონფიდენციალურობის პოლიტიკაში ჩამოთვლილ მომსახურების მიმწოდებლებს და ბიზნესის საკუთარ გუნდს, პროგრამას ან ვებჰუკს; ვიცავთ მათ უსაფრთხოებას და ვშლით, როცა ამას ბიზნესი ან Meta ითხოვს, როგორც ქვემოთ არის აღწერილი. იგივე შეზღუდვებს ვიცავთ Telegram-ის, Viber-ის, ელფოსტისა და SMS-ის მონაცემებზეც.
4. რამდენ ხანს ვინახავთ მონაცემებს
- შეტყობინების ტექსტი მიწოდების რიგში (დაშიფრული; API-ითაც და Inbox-შიც): იშლება შეტყობინების მიღებიდან ან გაგზავნიდან 30 დღეში, მიუხედავად იმისა, მიწოდებულია ის, მიწოდება საბოლოოდ ვერ მოხერხდა (დაახლოებით 2 დღის მცდელობის შემდეგ) თუ ასლი ჯერ კიდევ რიგშია, რადგან პროგრამას მოქმედი ვებჰუკის მისამართი არ აქვს.
- შეტყობინებების მეტამონაცემები (იდენტიფიკატორი, მიმართულება, ტიპი, დრო, კლიენტის იდენტიფიკატორი არხში): 90 დღე.
- კლიენტის ბოლო შეტყობინების დრო (პასუხის ფანჯრისთვის): 30 დღე; ელფოსტაზე, SMS-სა და საიტის ჩატში: 90 დღე.
- ელფოსტის თემა და მიმოწერის იდენტიფიკატორები, საიტის ჩატის სტუმრის სახელი, ტელეფონი და ელფოსტა (დაშიფრული): ბოლო განახლებიდან 90 დღე.
- ელფოსტის დანართები (დაშიფრული): 30 დღე.
- საიტის ჩატის პასუხები, რომლებიც სტუმრის ბრაუზერს ჯერ არ მიუღია (დაშიფრული): იშლება მიღებისთანავე, არაუგვიანეს 30 დღისა.
- დუბლიკატების შემოწმების ჩანაწერები: 30 დღე. დაკავშირების კოდები (მხოლოდ ჰეში): გამოყენებიდან ან ვადის გასვლიდან 7 დღე.
- მოთხოვნების ლიმიტის მრიცხველები, მათ შორის მოწყობილობის ქსელური მისამართი (IP) რეგისტრაციისა და შესვლისას: 1 დღე.
- Inbox-ის შეტყობინებები და ფაილები: სივრცის მფლობელის არჩეული ვადით: 90 დღე, 365 დღე (ნაგულისხმევად) ან სანამ მფლობელი სივრცეს არ წაშლის. უფრო ძველი შეტყობინებები და ფაილები ყოველდღე ავტომატურად იშლება.
- Inbox-ის საუბარი, შენიშვნები და კლიენტის დეტალები: იშლება, როცა საუბარში შეტყობინება აღარ რჩება, ან სივრცის წაშლისას.
- Inbox-ის შესვლის სესია: 30 დღე. ელფოსტის ბმულები: დადასტურება 3 დღე, პაროლის აღდგენა 1 საათი; ჩანაწერი იშლება გამოყენებიდან ან ვადის გასვლიდან 7 დღეში. მოწვევები: მოქმედებს 7 დღე, იშლება ვადის გასვლიდან 30 დღეში.
- Inbox-ის ვებჰუკის მოვლენები: შინაარსი იშლება გაგზავნისთანავე ან დაახლოებით 2 დღის წარუმატებელი მცდელობის შემდეგ; გაგზავნის ჩანაწერი (შინაარსის გარეშე) 7 დღეში.
- შეტყობინებების პარამეტრები (Telegram-ის ჩატის იდენტიფიკატორი, ბრაუზერის შეტყობინებების მისამართი): სანამ მომხმარებელი მათ არ გამორთავს.
- Inbox-ის მომხმარებლის ანგარიში (სახელი, ელფოსტა, პაროლის ჰეში, ორსაფეხურიანი შესვლის მონაცემები): სანამ მომხმარებელი მას თავად არ წაშლის (პარამეტრები > ანგარიშის წაშლა). მობილურის ნომერი და პირადი ნომერი ანგარიშთან ერთად იშლება, კომპანიის საიდენტიფიკაციო კოდი კი სივრცესთან ერთად; ერთჯერადი SMS კოდი 10 წუთი მოქმედებს და გამოყენებისთანავე იშლება. ანგარიში, რომელიც არცერთ სივრცეს აღარ ეკუთვნის და რომლითაც არავინ შედის, იშლება რეგისტრაციიდან 30 დღის შემდეგ. დაუდასტურებელი რეგისტრაციისთვის ცალკე ვადა ჯერ დადგენილი არ არის.
- კავშირის ჩანაწერი (არხის იდენტიფიკატორი და სახელი): გათიშვიდან 1 წლის შემდეგ იშლება სახელი, მფლობელის იდენტიფიკატორი და სხვა დეტალები, ხოლო თავად ჩანაწერი იშლება, როცა მას აღარაფერი უკავშირდება (Inbox-ის მიმოწერები მას ინახავს, სანამ სამუშაო სივრცე მათ არ წაშლის). ბიზნესის ჩანაწერი (სახელი და პროგრამის მიერ მინიჭებული იდენტიფიკატორი): გათიშვის შემდეგაც ინახება; ვადა ჯერ დადგენილი არ არის. არხის წვდომის ტოკენი იშლება გათიშვისთანავე.
- უსაფრთხოების აუდიტის ჩანაწერები (ვინ, რა და როდის გააკეთა; შეტყობინებების შინაარსისა და ტელეფონის ნომრების გარეშე): იშლება შექმნიდან 2 წლის შემდეგ. Meta-სგან მიღებული წაშლის მოთხოვნების ჩანაწერები (კოდი, თარიღი, პირის იდენტიფიკატორი მხოლოდ ცალმხრივი ჰეშის სახით): იშლება 2 წლის შემდეგ; მანამდე სტატუსის გვერდზე მოთხოვნის შედეგი ჩანს.
- ჰოსტინგის მოთხოვნების ჟურნალი: [შესავსებია] დღე. მონაცემთა ბაზის სარეზერვო ასლები: წაშლილი მონაცემები სარეზერვო ასლებიდან ქრება [შესავსებია] დღეში.
- ელფოსტისა და SMS-ის მიმწოდებლები ინახავენ წერილებისა და SMS-ის ასლს საკუთარი წესების მიხედვით; ვადას ვაზუსტებთ და აქ მივუთითებთ.
5. თუ ბიზნესის კლიენტი ხართ
- თქვენს მიმოწერაზე გადაწყვეტილებას იღებს ბიზნესი, რომელსაც მისწერეთ. შეტყობინებების ან მონაცემების წაშლა პირველ რიგში მას სთხოვეთ: ბიზნესს შეუძლია ისინი საკუთარ სისტემაში წაშალოს ან ჩვენ მოგვმართოს.
- თუ ბიზნესს ვერ უკავშირდებით, მოგვწერეთ: privacy@cyflow.ge. მიუთითეთ ბიზნესის სახელი, არხი და თქვენი მომხმარებლის სახელი, ნომერი ან ელფოსტა ამ არხში. მოთხოვნას 2 სამუშაო დღის განმავლობაში გადავუგზავნით ბიზნესს და დავეხმარებით, კანონით დადგენილ ვადაში გიპასუხოთ. მონაცემებს ვშლით ბიზნესის მითითებით, დამოუკიდებლად კი მხოლოდ მაშინ, როცა ამას კანონი მოითხოვს.
- თუ შეტყობინებას არხში წაშლით და არხი ამის შესახებ გვატყობინებს, ის ბიზნესის CyFlow Inbox-შიც იშლება, ფაილთან ერთად. მისი დაშიფრული ასლი მიწოდების რიგში მე-4 პუნქტის ვადით იშლება.
- საიტის ჩატის მიმოწერას ბიზნესის საიტზე თქვენი ბრაუზერი ინახავს. მის წასაშლელად ბრაუზერში ამ საიტის მონაცემები წაშალეთ.
- თქვენი კომენტარი Instagram-ზე ან Facebook-ზე საჯაროა, სანამ მას თქვენ ან ბიზნესი იქ არ წაშლით. CyFlow ინახავს მხოლოდ მის ასლს ბიზნესისთვის.
6. თუ CyFlow Inbox-ს იყენებთ
- სივრცის მფლობელი პარამეტრებში ჩამოტვირთავს ყველა მონაცემს (JSON) და კლიენტების სიას (CSV), ცვლის შეტყობინებების შენახვის ვადას (90 ან 365 დღე, ან სივრცის წაშლამდე) და შლის მთელ სივრცეს. სივრცის წაშლისას ითიშება მისი არხები, იშლება მათი წვდომის ტოკენები და მაშინვე იშლება ყველა საუბარი, შეტყობინება, ფაილი, შენიშვნა, კლიენტის დეტალები, შენახული პასუხი, მოწვევა და ვებჰუკი. წაშლა შეუქცევადია.
- ერთი კლიენტის საუბრის წასაშლელად (მაგალითად, კლიენტის თხოვნით) მფლობელი საუბარს ხსნის და ინფორმაციის პანელში აჭერს „საუბრის წაშლა“. მაშინვე იშლება საუბარი, მისი ფაილები, შენიშვნა და კლიენტის დეტალები, ასევე CyFlow-ში ამ კლიენტის შესახებ შენახული ჩანაწერები ამ არხზე. კლიენტის ტელეფონში ან აპში მიმოწერა რჩება. თუ წაშლა ვერ ხერხდება, მფლობელს შეუძლია მოგვწეროს მისი ელფოსტიდან: privacy@cyflow.ge; საუბარს 5 სამუშაო დღის განმავლობაში წავშლით.
- გუნდის წევრს გუნდიდან სივრცის მფლობელი ხსნის. ამის შემდეგ თქვენი ანგარიში რჩება, სანამ მის წაშლას არ მოითხოვთ.
- ანგარიშის წასაშლელად (სახელი, ელფოსტა, პაროლი, სესიები, ორსაფეხურიანი შესვლა) გადადით: პარამეტრები > ანგარიშის წაშლა და შეიყვანეთ პაროლი (და კოდი, თუ ორსაფეხურიანი შესვლა ჩართულია). ანგარიში მაშინვე იშლება. სივრცეები, სადაც მხოლოდ თქვენ ხართ, მასთან ერთად იშლება. თუ ხართ იმ სივრცის ერთადერთი მფლობელი, სადაც სხვა წევრებიც არიან, ჯერ მფლობელის როლი გუნდის სხვა წევრს გადაეცით ან წევრები მოაშორეთ. სხვა სივრცეებში თქვენ მიერ დაწერილი შეტყობინებები ბიზნესთან რჩება, თქვენი სახელის გარეშე. თუ ანგარიშში შესვლა აღარ შეგიძლიათ, მოგვწერეთ ანგარიშის ელფოსტიდან: privacy@cyflow.ge; ანგარიშს 10 სამუშაო დღის განმავლობაში წავშლით.
- შეტყობინებები: Telegram-ში გაუგზავნეთ CyFlow-ის ბოტს /stop ან გამორთეთ ისინი პარამეტრებში: თქვენი Telegram-ის ჩატის კავშირი იშლება. ბრაუზერის შეტყობინებები გამორთეთ პარამეტრებში ან ბრაუზერში.
7. თუ ბიზნესი CyFlow-ს სხვა პროგრამის მეშვეობით იყენებს (API)
- მიმოწერა, რომელიც პროგრამაში ინახება (მაგალითად, სალონის პროგრამაში), იშლება ამ პროგრამის მეშვეობით. მიმართეთ პროგრამას, ან მოგვწერეთ და მოთხოვნას 2 სამუშაო დღის განმავლობაში გადავუგზავნით. პროგრამას შეუძლია API-ით CyFlow-საც სთხოვოს, რომ ამ კლიენტის შესახებ შენახული ჩანაწერები მაშინვე წაშალოს.
- API-ის შემთხვევაში CyFlow თავად ინახავს მხოლოდ მე-4 პუნქტში ჩამოთვლილს: დაშიფრულ მიწოდების რიგს, მეტამონაცემებს, პასუხის ფანჯრის ჩანაწერებს, ელფოსტის მონაცემებს და კავშირის ჩანაწერებს.
- ამ ვადებზე ადრე წასაშლელად პროგრამა ან ბიზნესი გვწერს: privacy@cyflow.ge; ვმოქმედებთ 5 სამუშაო დღის განმავლობაში. ამისთვის API-ის ფუნქცია ჯერ არ არის.
- როცა მოთხოვნით ერთი კლიენტის მონაცემებს ვშლით, პროგრამას იმავდროულად ვუგზავნით წაშლის მოთხოვნას ამ კლიენტის შესახებ, ხოლო საკუთარი ასლის წაშლის ვალდებულება მას ჩვენთან დადებული ხელშეკრულებით აქვს.
8. არხის გათიშვა და რას შლის ის
- Telegram: გახსენით Settings > Telegram Business > Chatbots და წაშალეთ CyFlow-ის ბოტი; ან გათიშეთ პროგრამის პარამეტრებში, ან CyFlow Inbox-ში: არხები > გათიშვა.
- WhatsApp, Messenger და Instagram: გათიშეთ პროგრამის პარამეტრებში ან CyFlow Inbox-ში, ან წაშალეთ CyFlow Facebook-ის ან Instagram-ის პარამეტრებში (მე-9 პუნქტი) ან WhatsApp-ის ანგარიშიდან (მე-10 პუნქტი).
- Viber, საიტის ჩატი, ელფოსტა და SMS: გათიშეთ პროგრამის პარამეტრებში ან CyFlow Inbox-ში: არხები > გათიშვა. საიტის ჩატის შემთხვევაში ჩატის კოდიც მოაშორეთ თქვენს საიტს.
გათიშვისთანავე ახალი შეტყობინებები აღარ მოდის და იშლება არხის წვდომის ტოკენი (Viber-ის შემთხვევაში ბოტის ტოკენი, საიტის ჩატის შემთხვევაში მისი საიდუმლო გასაღები). უკვე მიღებული შეტყობინებები გათიშვით არ იშლება: Inbox-ში ისინი რჩება სივრცის შენახვის ვადის ამოწურვამდე ან სივრცის წაშლამდე, დანარჩენი კი მე-4 პუნქტის ვადებით იშლება. ჩანაწერი იმის შესახებ, რომ კავშირი არსებობდა (არხის იდენტიფიკატორი და სახელი), რჩება; მისი სახელი და დეტალები ერთი წლის შემდეგ იშლება (იხ. მე-4 პუნქტი).
9. CyFlow-ის წაშლა Facebook-ის ან Instagram-ის პარამეტრებში
CyFlow შეგიძლიათ წაშალოთ Facebook-ის პარამეტრებში (Business Integrations) ან Instagram-ის პარამეტრებში (აპლიკაციები და ვებსაიტები). თუ მხოლოდ აპლიკაციას წაშლით, Meta ამის შესახებ გვატყობინებს: ვთიშავთ კავშირს და ვშლით მის წვდომის ტოკენს. თუ მონაცემების წაშლასაც მოითხოვთ, Meta წაშლის მოთხოვნას გვიგზავნის და ჩვენ მაშინვე:
- ვთიშავთ ამ პირის მიერ დაკავშირებულ კავშირებს და ვშლით მათ წვდომის ტოკენებს;
- კავშირის ჩანაწერიდან ვშლით ამ პირის იდენტიფიკატორებს და ანგარიშის სახელს;
- ვშლით შეტყობინებების მეტამონაცემებს და პასუხის ფანჯრის ჩანაწერებს;
- ვშლით ამ კავშირების საუბრებს, შეტყობინებებს, ფაილებს, შენიშვნებსა და კლიენტის დეტალებს CyFlow Inbox-ში;
- ვშლით ამ კავშირების შეტყობინებების დაშიფრულ ასლებს მიწოდების რიგში, მათ შორის უკვე მიწოდებულს;
- პროგრამას, თუ ასეთი არსებობს, ვატყობინებთ, რომ კავშირი შეწყდა, და ვუგზავნით წაშლის მოთხოვნას, რათა მან ამ კავშირიდან მიღებული მონაცემები წაშალოს.
მაშინვე არ იშლება: ჩანაწერი იმის შესახებ, რომ კავშირი არსებობდა, გვერდის ან Instagram ანგარიშის იდენტიფიკატორით; აუდიტის ჩანაწერები (შეტყობინებების შინაარსის გარეშე); თავად მოთხოვნის ჩანაწერი (დადასტურების კოდი, თარიღი და პირის იდენტიფიკატორი მხოლოდ ცალმხრივი ჰეშის სახით), რომელიც ადასტურებს, რომ მოთხოვნა შევასრულეთ. პროგრამა, რომელმაც შეტყობინებები მიიღო, საკუთარ ასლს ინახავს: წაშლის მოთხოვნას მას ავტომატურად ვუგზავნით, ხოლო წაშლის ვალდებულება მას ჩვენთან დადებული ხელშეკრულებით აქვს. პროგრამას შეგიძლიათ პირდაპირაც მიმართოთ.
Meta გაჩვენებთ დადასტურების კოდს და ბმულს ჩვენს სტატუსის გვერდზე (cyflow.ge/data-deletion/status), სადაც მოთხოვნის მდგომარეობას ნებისმიერ დროს ნახავთ.
10. CyFlow-ის წაშლა WhatsApp-ის ანგარიშიდან
თუ ბიზნესი CyFlow-ს თავისი WhatsApp Business ანგარიშიდან წაშლის (Meta-ს ბიზნეს პარამეტრებში) ან ამ ანგარიშს წაშლის, Meta ამის შესახებ გვატყობინებს და ჩვენ მაშინვე:
- ვთიშავთ ამ ანგარიშის ყველა კავშირს და ვშლით მათ წვდომის ტოკენებს;
- კავშირის ჩანაწერიდან ვშლით ანგარიშის სახელს და იდენტიფიკატორებს;
- ვშლით შეტყობინებების მეტამონაცემებს და პასუხის ფანჯრის ჩანაწერებს;
- ვშლით ამ ნომრების საუბრებს, შეტყობინებებს, ფაილებს, შენიშვნებსა და კლიენტის დეტალებს CyFlow Inbox-ში;
- ვშლით ამ ნომრების შეტყობინებების დაშიფრულ ასლებს მიწოდების რიგში, მათ შორის უკვე მიწოდებულს;
- პროგრამას, თუ ასეთი არსებობს, ვატყობინებთ, რომ კავშირი შეწყდა, და ვუგზავნით წაშლის მოთხოვნას, რათა მან ამ ნომრებიდან მიღებული მონაცემები წაშალოს.
მაშინვე არ იშლება: ჩანაწერი იმის შესახებ, რომ კავშირი არსებობდა, ნომრის იდენტიფიკატორით, და აუდიტის ჩანაწერები (შეტყობინებების შინაარსის გარეშე). ამ შემთხვევაში Meta დადასტურების კოდს არ გასცემს, ამიტომ სტატუსის გვერდზე ჩანაწერი არ ჩნდება.
11. მოთხოვნა და ვადები
მოგვწერეთ: privacy@cyflow.ge და მიუთითეთ:
- ვინ ხართ: სივრცის მფლობელი, გუნდის წევრი, პროგრამა ან ბიზნესის კლიენტი;
- ბიზნესის სახელი და არხი;
- თქვენი მომხმარებლის სახელი, ნომერი ან ელფოსტა ამ არხში, ან Meta-ს მიერ მოცემული დადასტურების კოდი.
ვამოწმებთ, რომ მოთხოვნა თქვენგან არის (მაგალითად, ვპასუხობთ ანგარიშის ელფოსტაზე ან ვთხოვთ ბიზნესს დადასტურებას). გპასუხობთ 10 სამუშაო დღის განმავლობაში; განსაკუთრებულ შემთხვევაში ეს ვადა შეიძლება გაგრძელდეს არაუმეტეს 10 სამუშაო დღით, რის შესახებაც დასაბუთებით დაუყოვნებლივ გაცნობებთ. თუ თქვენზე ევროკავშირის მონაცემთა დაცვის ზოგადი რეგულაცია (GDPR) ვრცელდება, პასუხს ნებისმიერ შემთხვევაში ერთ თვეში მიიღებთ. მოთხოვნის განხილვა უსასყიდლოა. როცა ვშლით მონაცემებს, რომლებიც პროგრამამ ან ბიზნესის ვებჰუკმა მიიღო, ვთხოვთ მათაც წაშალონ თავიანთი ასლი, ხოლო დასრულებისას გატყობინებთ.
12. რისი შენახვა შეიძლება მოგვიწიოს
- მონაცემები, რომელთა შენახვაც კანონით გვევალება (მაგალითად, ბუღალტრული დოკუმენტები, როცა ფასიანი გეგმები დაემატება);
- მონაცემები, რომლებიც სამართლებრივი მოთხოვნის, მიმდინარე დავის, გამოძიების ან სასამართლო საქმისთვის არის საჭირო, ან რომელთა შენახვაც სასამართლომ ან სხვა უფლებამოსილმა ორგანომ დაგვავალა, მხოლოდ ამ მიზნით და საჭირო ვადით;
- აუდიტის ჩანაწერები და წაშლის მოთხოვნების ჩანაწერები, რომლებიც შეტყობინებების შინაარსს არ შეიცავს (მე-4 პუნქტი);
- ასლები მონაცემთა ბაზის სარეზერვო ასლებში, სანამ ისინი არ გადაიწერება ([შესავსებია] დღე).
თუ რაიმეს წაშლა ვერ ხერხდება, გაცნობებთ, რომელ მონაცემებს და რატომ. შენახულ მონაცემებს ვბლოკავთ და სხვა მიზნით არ ვიყენებთ.
13. კონტაქტი
მონაცემებთან დაკავშირებული კითხვები: privacy@cyflow.ge. თუ მიიჩნევთ, რომ თქვენი უფლებები დაირღვა, შეგიძლიათ მიმართოთ სახელმწიფო აუდიტის სამსახურს, რომელიც პერსონალურ მონაცემთა დაცვის ზედამხედველობას ახორციელებს (sao.ge), ან სასამართლოს.